8In che la stésa cuntrada lì gh'èra di pasturi, che i pasévun la not ni campi per fà la guardia al sò grege.
9Vegn che un àngiul del Signur el ghe cumparìs a lur, e la gloria del Signur i ha circundadi de un gran lüŝùr, sichè i s'èrun stremidi minga poch.
10Ma l'àngiul el g'ha dit: «G’hì no da 'véghe pagüra: ecu, mì ve anünci una bela nuità, che la purtarà una gran cuntentésa per tüt el pòpul:
11incö, ne la cità de Davide, l'é nasüd per vialtri el Salvatur, che l'é el Messia, el Signur.
12«E quest che ve diŝi ve servarà de indicasión: truarì un fiulin in fase, disteŝ sü una travìŝ» .
13Sübet dopu, inturnu a l'àngiul s'èra radünàda una cùbia de altri àngiuli de la milisia celesta, che i cantévun al Signur e i diŝévun insì:
14«Gloria al Signur ni cei püsé alti e pace sü la tera ai òmini che lü el ghe vör ben».
15E quand i àngiuli i s'èrun ŝluntanadi da lur per turnà sü nel cel, i pasturi i se diŝévun tra de lur: «'Ndém dunca fin a Betlemme a vede quel che l'é sücès e che el Signur el g'ha fai cunùs».
16I én andai lüghìdi e i han truad Maria, Giuseppe e 'l fiulin pugiad sü la travìŝ.
17Dopu d'avél vist i han trai in gir la vuŝ de quel che gh'èra stai dit a lur de chel fiulin lì.
18E tüti quei che i a scultévun i restévun a buca averta per le robe che i pasturi i ghe cüntévun.
19Maria, pö, la tegneva nel sò cör tüte ste robe, e la ghe penseva a sura.
20E i pasturi i èrun turnadi indré, e i cantévun la gloria e la virtü del Signur per tüt quel che i évun vist e sentid, secund cunfurma a quel che gh'èra stai dit.
