1Nasüd Gesù in Betlemme de Giudea, al temp del re Erode, ecu che di Magi i èrun rivadi da la part che vegn sü el sul a Gerusalemme, 2e i dumandévun: «Duè che l'é el re di giudei che l'é apena vegnüd al mund? Ém apena vist la sò stela da le noste part e sém vegnüdi per aduràl».
3Mis al curente de che la roba chì, el re Erode el s'é preucupad, e cun lü tüta Gerusalemme. 4E radünàdi tüti i capi de i sacerdoti e i maestri de la Lege, g'ha dumandad a lur duè che el Cristo el gh'éva da nàs.
5Lur i g'han respundüd: «In Betlemme de Giudea; difati l'éra stai scrit propi insì dal prufeta: 6E tì, Betlemme, tera de Giuda, te sé no la püsé picinina tra le cità de Giuda; da tì, difati, vegnarà föra un cap, che 'l guidarà Israele, el mé pòpul».
7Alura Erode l'ha ciamad da l’iscùŝ i Magi e 'l s'é fai spiegà de precìŝ da quan' temp i évun vist la stela; 8pö, i ha 'ndirisadi a Betlemme e 'l g'ha dit: «Andé e cerchì ben el fiulin; e quan' l'avarì truad fémel savé, perchè anca mì pöda andà a riverìl».
9Quei, sentid el re, i èrun partidi. E ecu che la stela ch'i évun vist da le sò part la ghe feva da guida, fin a quand, rivada sül post in due el steva el fiulin, la s'é fermada.
10Nel vede la stela, s'én sentidi ciapà da una gran cuntentésa.
11E, dopu che i évun mis i pé nel post in due el se truéva, i han vist el fiulin cun Maria, sò mama; i s'én ingenugiadi e chinadi fin a tera per aduràl.
Pö i han tirad föra i baüléti che i gh'évun cun lur e i g'han regalad or, incens e mirra.
12Dopu, aviŝadi in sogn de pasà no amò da Erode, i èrun turnadi indré al sò paeŝ per un'altra via.
